پاریسان جێرمان ئه‌و ساوایه‌ی ركابه‌ری هه‌مووان ده‌كات

 

نوسینی: هه‌وراز كاوه‌
یانه‌ی پاریسان جێرمانی فه‌ره‌نسی له‌ ساڵی 1970 دامه‌زراوه‌، تا ئه‌وكاته‌ی سه‌رمایه‌داره‌كانی عه‌ره‌ب نه‌چوونه‌ ئه‌وروپا، بۆ وه‌به‌رهێنان له‌ كه‌رتی وه‌رزشی، ئه‌م تیپه‌ رۆڵی گه‌وره‌ی نه‌بوو. له‌ ساڵی 2010 كۆمپانیای قه‌ته‌ر بۆ وه‌به‌رهێنانی وه‌رزشی سه‌ره‌تا له‌ 70% پشكه‌كانی یانه‌كه‌ی كڕیه‌وه‌، تا له‌ ساڵی 2011 ناسر خلێفی سه‌رۆكی كه‌ناڵه‌كانی (بین سپۆرت) و سه‌رمایه‌داری قه‌ته‌ری بووه‌ خاوه‌نی یانه‌كه‌، كه‌ ئه‌مه‌ش به‌ رۆژی به‌خه‌تی تیپه‌كه‌ داده‌نرێت، چونكه‌ ده‌ستیكرد به‌هه‌ڵڕشانی پاره‌یه‌كی زۆر و له‌ سه‌ره‌تای وه‌رزی یه‌كه‌م به‌ بری 200 ملیۆن یۆرۆ یاریزانی گواسته‌وه‌.

به‌ڵام به‌هۆی ئه‌وه‌ی ئه‌م یانه‌ پاریسییه‌ هیچ بنه‌مایه‌كی ئه‌كادیمی گه‌وره‌ی نه‌بوو، ناچار تیپه‌كه‌ به‌ر له‌وه‌ی بیر له‌ یاریزانی گه‌وره‌ بكاته‌وه‌ بریاریاندا كارلۆ ئه‌نچیلۆتی ئیتاڵی بگوازنه‌وه‌ ڕیزه‌كانیان، تا به‌شَوه‌یه‌كی بنه‌ره‌تی و ستانداردی جیهانی یانه‌ گه‌وره‌كان تیپێكی به‌هێز و بناغه‌یه‌كی گه‌وره‌ له‌ژێر خانه‌ی تیپه‌كه‌ دروست بكات، ته‌نانه‌ت كارلیتۆ له‌ كتێبه‌كه‌یدا باسی ئه‌وه‌ ده‌كات كاتێك بووه‌ به‌ راهێنه‌ری یانه‌كه‌، ئه‌و ئه‌و تیپه‌ شوێنی مه‌شق و نان خواردنی یاریزانانی نه‌بووه‌، دواتر ئه‌و خۆی دروستی كردووه‌.

له‌ قۆناغی دووه‌م هه‌وڵیاندا به‌دوای ناوی گه‌وره‌دا بگه‌ڕێن و تیپه‌كه‌ پڕ بكه‌ن له‌ ئه‌ستێره‌ی جیهانی. یه‌كێك له‌و یاریزانانه‌ی رێچكه‌ی شكاندو ڕویكرده‌ یانه‌كه‌ ئیبراهیمۆڤیچی سویدی بوو، كه‌ ئه‌م هێرشبه‌ره‌ توانی به‌خێرایی خۆی له‌گه‌ڵ كه‌شی تیپه‌كه‌ و خولی فه‌ره‌نسی بگونجَنێت، ته‌نانه‌ت تیپه‌كه‌ وای لێهات به‌ ئاسانی ده‌ستی گرت به‌سه‌ر خولی لایگا وه‌ندا.
له‌ قۆناغی دووه‌م خلێفی كاری له‌سه‌ر ئه‌وه‌كرد به‌ره‌و گه‌وره‌كانی ئه‌وروپا و خولی چامپیۆنسلیگ هه‌نگاو هه‌ڵبگرن و چه‌ندین یاریكه‌ری دیكه‌یان بۆ ئه‌و مه‌به‌سته‌وه‌ گواسته‌وه‌ له‌ وانه‌:
تیاگۆ سلڤای به‌رازیلی و ئه‌دیسۆن كاڤانی هێرشبه‌ری ئۆرگوای، كه‌ یانه‌كه‌ تاراده‌یه‌ك ده‌یتوانی ركابه‌ری تیپه‌كه‌ گه‌وره‌كان بكات، به‌ڵام كاتێك له‌ ساڵی 2017 له‌ قۆناغی 16ـی خولی یانه‌ پاڵه‌وانه‌كان رووبه‌روی یانه‌ی به‌رشه‌لۆنه‌ بوونه‌، له‌ یاریی یه‌كه‌م به‌ چوار گۆڵ براوه‌ بوون، كه‌چی له‌ یاریی گه‌رانه‌وه‌ شه‌ش گۆڵیان لێكرا و خوله‌كه‌یان جیهێشت.

له‌ ساڵی 2017 تیپه‌كه‌ به‌ بری 226 ملیۆن یۆرۆ نیماری گواسته‌وه‌ و جارێكی دیكه‌ چانسی دایه‌وه‌ به‌ راهێنه‌ر ئۆنای ئیمری، به‌ڵام سه‌ركه‌توو نه‌بوو، بۆیه‌ ناچار تۆماس تۆخێلی ئه‌ڵمانیان له‌ بروسیا دۆرتمۆنده‌وه‌ گواسته‌وه‌ و تا راده‌یه‌ك به‌ بوونی كاڤانی و نیمار و مباپی یانه‌ فه‌ره‌نسییه‌كه‌ جێگه‌ی خۆی له‌سه‌ر شانۆی یانه‌ گه‌وره‌كانی ئه‌وروپا كرده‌وه‌، تا ئه‌وكاته‌ی گه‌یشتنه‌ یاریی كۆتایی چامپیۆنسلیگی 2020و له‌وێ‌ به‌ یانه‌ی بایرن میونی ئه‌ڵمانی یه‌ك و هیچ شكستیان هێنا.

له‌ ساڵی 2020 ئیداره‌ی تیپه‌كه‌ پێیان وابوو راهێنه‌ر هۆكاربووه‌ بۆ كه‌وتنی ئه‌وان، بریاردرا راهێنه‌ری پێشووی یانه‌ی تۆتنهام ماوریسۆ پۆچه‌تینهۆ بخه‌نه‌ جێگه‌ی تۆخێل، كه‌ ئه‌و راهێنه‌ره‌ ئه‌رجه‌نتینییه‌ توانی به‌ ئاسانی تیپه‌كه‌ی بگه‌یه‌نێته‌ قۆناغی پێش كۆتایی خوله‌ ئه‌وروپییه‌كه‌، به‌ڵام ئه‌مجاره‌ خولی فه‌ره‌نسی له‌ده‌ستدا، بۆیه‌ له‌مكاته‌دا تیپه‌كه‌ بیر له‌وه‌ ده‌كه‌نه‌وه‌ به‌ هێنانی چه‌ند یاریزانێكی به‌ ئه‌زموون و گه‌وره‌ هاوسه‌نگی رابگرن و پێش به‌ رۆشتنی مبپایش بگرن بۆ یانه‌ی ریاڵ مه‌درید، تا ئه‌وه‌ی له‌ وه‌رزی داهاتوو به‌ تیپێكی پر له‌ ئه‌ستێره‌ی نموونه‌ی (رامۆس و ئه‌شه‌رف حه‌كیمی و دۆناڕۆما ماركینۆس و ڤیراتی و نیمار) بگه‌ن به‌ خه‌ونی نازناوی چامپیۆنسلیگ و له‌ ساوابوونه‌وه‌ ببن به‌ یانه‌یه‌كی گه‌وره‌.

بابه‌تی هاوشێوه‌

Back to top button
Close