پاسەوانە كۆنەكانی زێدان

 

بۆ چوارەمین یاری یەك بەدوای یەك ڕیال مەدریدەكەی زێدان توانی سەركەوتن بەدەستبهێنێت و كەمێك لە پێگە و شكۆی یانەكە بگێڕێتەوە، ئەوەش دوای زنجیرەیەك شكستی یەك بەدوای یەك بەرامبەر چەند یانەیەكی لاواز كە خەریك بوو بەهۆیەوە، زیزۆی خاوەن 3 چامپیۆنزلیگی یەك بەدوای یەك باجەكەی بەقورسی بدات و پۆستەكەی لەسەر دابنێت و لە ئەركی ڕاهێنەرایەتی مێرەنگی دوور بخرێتەوە، لێرەدا پێویستە هەڵوەستەیەك لەسەر ئەو سەركەوتنانانە بكەین بزانین زێدان چۆن توانی لەماوەی كەمتر لە دوو هەفتە ئاست و ئەنجامەكانی یانەكە 180 پلە بگۆڕێت و 4 سەركەوتنی گرنگ بەرامبەر چوار یانەی بەهێزی وەك كلادباخ و سیڤییا و ئاتلەتیكۆ مەدرید و ئاتلەتیك بلباو تۆمار بكات.

لێرە جگە لە لایەنی تاكتیك و بوێری زێدان لە پلانەكانی شتێكی زۆر گرنگ هەیە كە كاریگەری سیحری بەسەر یانەكە هەبوو، ئەویش ئەوە بوو كە زێدان وازی لە گۆڕینی ڕێژەیەكی زۆری پێكهاتەكەی هێنا و بڕیاری دا بەپلەی یەكەم پشت بە پاسەوانە كۆنەكانی ببەستێت، بەلێ بڕیاریدا پشت بە كڕۆس و رامۆس و ڤاران و بێنزیما و ڤاسكوێز و مۆدڕیچ و كاسیمیرۆ كارڤەخال قایم بكات، ئەوانە پاسەوانە كۆنەكانی كۆشكی یانەی شاهانەن و هەر زیزۆ لەگەڵ ئەوانە 3 چامپیۆنزلیگی بردوەتەوە، بۆیە زێدان دوای شكستەكانی بینی كە چۆن ئەو پاسەوانە كۆنانە هاتنە دەست و بەهەموو توانای خۆیان یارییان كرد و بەرگرییان لە راهێنەر كرد و باشترین ئاستی خۆیان پیشاندا وێرای ئەوەی كەتەمەنی هەندێك لەو یاریزانانە لەسەرووی 33 ساڵە ئەوانی دیكەش 30 ساڵن یان نزیكن لەو تەمەنە، بەڵام تەمەن هیچ ڕێگر نەبوو، بۆیە ئەوەی لە یارییەكانی ئەو دواییە پێشكەشیان كرد سەرسوڕهێنەر بوو، لێرەش تەبایی و شارەزایی ئەو یاریزانانە لە یاریكردن لەگەڵ یەك ڕۆڵی سەرەكی هەبوو، ئەوە وای كرد زێدان متمانەی بەو یاریزانانە زۆر بەهێزتر بێت، چونكە هەر ئەوان لە رۆژە ڕەشەكان فریای زیزۆ كەوتن و بە تۆمار كردنی زنجیرەیەك سەركەوتن ڕیالیان گەڕاندەوە سەر ڕێچەكەی سەركەوتنەكان و باسی لادانی زێدانیان بۆ كاتێكی نادیار دواخستەوە و متمانەیان بۆ گەڕاندەوە.

جگە لەوەش ئەوەی خاڵێكی پڕشنگدار و گرنگە بۆ ڕیال مەدرید لەگەڵ زێدان ئەوەیە كە هەر جارێك بكەوێتە لێواری كەوتن و هەڵدێر هەموو یەكگر دەبن و بە ورەیەكی بەرز و متمانەیەكی گەورە ڕۆژە سەختەكان تێپەڕ دەكەن و ڕیال مەدرید دەگەڕێننەوە باری ئاسایی خۆی، هەر ئەوەش بوو وای كرد ڕیال مەدریدێكی شكست خواردوو لە چامپیۆنزلیگ و لیگای ئیسپانیا وا لێبكات بە ماوەی دوو هەفتە پێشەنگی كۆمەڵەكەی خۆی لە چامپیۆنزلیگ بگرێت و دواتریش بۆ پێشەنگی یانەكانی لیگا سەركەوێتەوە، لێرەش پاسەوانە كۆنەكان كارتە بەهێزەكەی زێدان و وشەی نهێنی سەركەوتنەكانی بوون.

Tags

بابه‌تی هاوشێوه‌

Back to top button
Close