ڕاهێنەری پێشووتری بایەڕن میونشین دوو یانە بۆ بردنەوەی چامپیۆنزلیگ دەپاڵێوێت
ئۆتمار هاتیسفیڵد، ڕاهێنەری پێشووتری یانەی بایەڕن میونشینی ئەڵمانی لە تازەترین چاوپێکەوتنی ڕۆژنامەوانیدا ڕایگەیاند کە ئەمساڵ ئاستی مێسی و کریستیانۆ ڕۆناڵدۆ بەپێی پێویست نییە بۆیە یانەیەکی ئینگلیزی جامەکە دەباتەوە.
هاتیسفێلد لەم بارەیەوە، بە ماڵپەڕی (اومنیی سپۆرت)ی گوت” ئاستی ڕۆناڵدۆ و مێسی وەک جاران نییە و لە هەموو ساتێک لە رۆژی خۆیان نین، بۆیە من پێم وایە براوەی چامپیۆنزلیگ یانەیەکی ئینگلیزی دەبێت، بۆیە من دڵنیام کە جامەکەی چامپیۆنزلیگی ئەمساڵ بۆ مانچێستەر سیتی یان لیڤەرپوول دەبێت و لەو دوو یانەیە دەرناچێت”.
ڕاهێنەرە ئەڵمانییەکە گوتیشی یۆڤێنتۆس یانەیەکی بەهێزە بەڵام ئاسان نییە بتوانێت قۆناخی هەشت ببڕێت و ئەرکی قورس دەبێت، هەر چەندە لە ڕووی تاکتیک و پەیوەست بوونی یاریزانان بە ڕێنماییەکانی ڕاهێنەربە تیپێکی نموونەیی هەژمار دەکرێت.
لەکۆتاییدا پێویستە بگوترێت کە بەر لە هەردوو یاری ئەمشەوی بارسێلۆنا لەگەڵ مێسی بەرانبەر مانچێستەر یۆنایتد و یۆڤێنتۆسیش لەگەڵ ڕۆناڵدۆ بەرانبەر ئەیاکسی هۆڵەندی، دەبێت چی ڕووبدات، ئایا ئەو دوو ئەستێرەیە لە یاریگا وەڵامی ڕاهێنەرە گەورەکەی ئەڵمانیا دەدەنەوە، یان ناتوانن هاوکاری پێویست پێشکەش بە یانەکانیان بکەن.