ئەمشەو کریستیانۆ رۆناڵدۆ تووشی هەمان نەگبەتی دەبێتەوە؟

0

کریستیانۆ رۆناڵدۆ تاکو ئێستا نەیتوانیوە هیچ گۆڵێک لە یاریگەی سان سیڕۆ تۆمار بکات و ئەمشەو دەترسێت جارێکی دیکە هەمان نەگبەتی تووشی بێتەوە.
کریستیانۆ رۆناڵدۆ پێنج جار لە یاریگەی سان سیڕۆ (جیۆسێپی میاتزا) یاریی کردووە، بەڵام بەبێ ئەوەی هیچ گۆڵێک تۆمار بکات و تاکو ئێستا گرێی بەختی کریستیانۆ لەم یاریگەیە بەستراوە.
کریستیانۆ سێ جار لەم یاریگەیە رووبەڕووی ئەیسی میلان بووەتەوە، جارێک دژی ئینتەر میلان یاریی کردووە و جارێکیش لە یاریی کۆتایی چامپیۆنزلیگ چووەتە ئەم یاریگەیە، بەڵام لە سەرجەمیان دەستبەتاڵ دەرچووە و هیچ گۆڵێکی پێنەکراوە.
کریستیانۆ لەگەڵ مانچێستەر یونایتد لە ساڵانی 2005 و 2007 دوو جار لەسەر یەک لە سان سیڕۆ بەرامبەر میلان دۆڕاوە، لەگەڵ ریال مەدریدیش ساڵی 2010 بە دوو گۆڵ لەگەڵ میلان یەکسانبوو، جارێکیش لەگەڵ ریال مەدرید دژی ئینتەر میلان لەم یاریگەیە یاریی کردووە و بەبێ گۆڵ یەکسانبوون.
دوو ساڵ لەمەوبەر لە فایناڵی چامپیۆنزلیگ کریستیانۆ بەرامبەر ئاتلێتیکۆ مەدرید گەرچی گۆڵی نەکرد، بەڵام لەگەڵ مێرێنگی نازناوەکەی بەدەستهێنا و بە دڵخۆشی لە یاریگەکە چووە دەرەوە.
ئەمشەو کاتژمێر 10:30 جارێکی دیکە دۆن دەگەڕێتەوە هەمان یاریگە و لە گەڕی دوازدەمی سێریا ئەی لەگەڵ یۆڤێنتۆس دەبێتە میوانی ئەیسی میلان.

Comments - کۆمێنتت چییە ؟

کۆمێنتت

Share.

Comments are closed.