هۆكاره‌كانی ئاوەژوو بوونی ئاستی تۆتێنهام هۆتسپێر له‌م وه‌رزه‌دا

نووسینی: ساجد كه‌مال (رۆژنامه‌نووسی وه‌رزشی)

ئەگەر بە ووردی سەرنجمان دابێت لە ئاستی یانەی تۆتێنهام هۆتسبیر، بە دەستپێكێكی نایاب هەنگاوەكانی هەڵهێنا و دەستبەجێ ژمارەیەكی قورسی لەسەر تای تەرازووی گەروەركان دانا، گەشتی یانەكە لەكەنارێكی ئارامدا گوزەری دەكرد، بێ ئاگا لەشەپۆڵی فراوانی یانە گەورەكانی پریمەرلیگ و بەریەك كەوتنی لەگەڵ دوو لە بەهێزترینی پاڵەوانی لالیگای ئیسپانی و بۆندس لیگای ئەڵمانی (ریال مەدرید – بروسیا دۆرتمۆند) لەنێو ململانێكانی چامپیۆنزلیگدا.

هۆكار زۆرن بۆ هەڵگەرانەوەی ئاستی یانە ئینگلیزیەكە، بەڵام لێرەدا ئاماژە بەچەند هۆكارێك دەكەین لەوانە:-

1- نەپاراستنی هاوسەنگی تیپ:- لە هەر بارودۆخێكی گونجاو و نەگونجاودا، ئەركی بەرێوەبەری هونەری یانەكەیە هاوسەنگی تیپ لە ئەستۆ بگرێت، لە دەستپێكی دارشتنی پلانی ساڵانەی خۆیدا، هاوسەنگی تیپ لەسەرەتای وەرز تا كۆتایی وەرز بكاتە خاڵی جەوهەری، دەبینین یانەكە لەم خاڵەدا كەمتەرخەمی هەڵبرژاردووە.

2- پێكدادانی لەگەڵ گەورەكاندا:- دروستە هەموو راهێنەرێك دەبێت وەك ئەكتەرێكی لێهاتوو ئامادەیی هەموو شانۆگەریەكی تراژیدی بێت و بەوپەری توانای خۆی رۆڵی قارەمان ببنێت لەسەر ستەیجدا، بەڵام لەبەد چانسی (ماوریسیۆ پۆچه‌تینۆ) لە سەرەتای وەرزەوە، لەنێو بەرداشی یانە گەورەكانی پریمەرلیگ و هەردوو یانە گەورەكەی (ریال مەدرید – بروسیا دۆرتمۆند) لە چامپۆنزلیگ هاردڕا و توانستی یانەكە روو لەكەمی كرد، بروانە ئەو یاریانەی كە تۆتێنهام لە پریمەرلیگ شكستی تێدا هێناوە (چێلسی، مان یونایتد، -ئارسیناڵ، لیستەر سیتی).

3- نەبوونی پلانی بی:- بۆ وەرگرتنی سەقامگیری و بەردەوام بوون (استمراریە) لەهەر كارێكدا، پێویستمان بە پلانی یەدەگ یاخود شوێنگرەوەی پلانی بنەرەتی دەبێت. بەڵام ئەو سەرئێشەیەی كە بۆ راهێنەرە ئەرجەنتینیەكە دروست بووە، ناتوانێت قورسی ئازار بنۆشێت، نەبوونی كەرەستەكانی ئەو پلانەیە، كە تارادەیەك ناتوانن هاوسەنگی بەتیپەكەی بدات لە بەشێك لە یارییە ئاست مامناوەندەكاندا، بۆ نموونە لەیاری (لیستەرسیتی) بەهۆی نەبوونی پلانی دووهەم یانەكە دووچاری شكستێكی چاوەروان نەكراو هات.

4- پێكانی دڵ و ئەستێرەی یەكەمی یانەكە (هاری كین):- رەنگە ئەمە تارادەیەك خاڵێكی لاواز بێت، بەڵام كاریگەری راستەوخۆی لەسەر دارشتە و پلانی راهێنەر دروست كرد، گەرچی ئەستێرەی یانەكە لەچەند بۆنەیەكدا لەگەڵ هاورێیانی ئامادە نەبوو، بەڵام ئەوە ئاشكرایە ئامادەنەبوونی دڵی یانەكە رەنگە كاریگەری نەرێنی و دەروونی لەسەر یاریزانانی هاورێی دروست بكات، هاوشێوەیی ئەوەی گەر (میسی – رۆنالدۆ) یاوەری و سەركردایەتی (بەرشەلۆنە – ریال مەدرید) نەكەن.

لەكۆتاییدا ئەو خاڵانەی كە ئاماژەیان پێ كرا، رەنگە بارودۆخێك بن ده‌كرێت بەسەر زۆربەی یانەكاندا بێت، بەڵام رۆڵی سەرەكی لە چارەكردنی ئەو گرفتانەدا، خودی بەرێوەبەری هونەری یانەكە پێی هەڵدەستێت، بۆیە ئەركی سەرشانی پۆچه‌تینۆی زیرەكە، هەست بەو بەرپرسیارەتیە بكات و دووبارە دۆخی یانەكە هاوسەنگ بكاتەوە، كە لە بنەڕەتدا وەك ئاماژەم پێ كرد ئەوە خاڵی دەستپێك و جەوهەری راهێنەرە.

Comments - کۆمێنتت چییە ؟

کۆمێنتت

شەیر بکە لەگەڵ هاوڕێیانت.

دەربارەی نووسەر

Leave A Reply