ریاڵ و ئه‌تله‌تیكۆ چۆن براوه‌بون؟

نوسینی: هه‌وراز كاوه‌ (شرۆڤه‌كاری تۆپی پێ)

شه‌وی پێشووتر هه‌ردوو یانه‌ی ڕیاڵ مه‌درید و ئه‌تله‌تیكۆ مه‌درید به‌بێ‌ گۆڵ یه‌كسان بوون، یارییه‌كی پڕ له‌ حه‌ماس و بێزاركه‌ر، به‌ تایبه‌تی بینه‌ری هه‌ردوو یانه‌كه‌ی هیلاك و ماندوكردبوو، چونكه‌ هه‌میشه‌ هانده‌ران چێژ له‌ تۆماركردنی گۆڵ و بردنه‌وه‌ی لایه‌ك ده‌بینن، نه‌ك ئه‌وه‌ی تیپێك تا كۆتایی به‌رگری بكات و دژه‌كه‌شی ته‌نیا تۆپه‌كانی پێ‌ بێت.

دیگۆ سیمۆنی سه‌ره‌تا به‌ پلانی (4-2-3-1) یاریی ده‌كرد، به‌ڵام له‌كاتی هێرشبردن ده‌گۆڕا بۆ (4-4-2) كه‌ پشتی ده‌به‌ست به‌ چوار یاریزانی وه‌كو (بارتی، سائول، گابی، كۆكی)، كه‌ هه‌ردوو یاریزان گریزمان و كۆریا هه‌میشه‌ به‌بێ‌ تۆپ زۆرترین گوشاریان ده‌خسته‌ سه‌ر به‌رگری یانه‌ی ڕیاڵ مه‌درید، جگه‌ له‌وه‌ سیمۆنی ڕاهێنه‌ر كه‌متر ده‌یوست تیپه‌كه‌ی به‌ كۆمه‌ڵ یاریی بكه‌ن، به‌ڵكو كاری له‌سه‌ر ئه‌وه‌ ده‌كرد ئه‌ستێره‌كانی به‌ شێوه‌ی فه‌ردی تۆپه‌كان ده‌ستبخه‌ن و گوشار دروست بكه‌ن، بۆ نموونه‌: كۆریا و سائول و كۆكی به‌ ته‌نیا (16، 21 ،26) جار تۆپ به‌ر پێیان كه‌وت، كه‌ ئه‌وه‌ش هۆكاری نه‌بوونی ڕووبه‌ربوو بۆ یاریزانه‌كانی سیمۆنی، كه‌ زۆربه‌یان له‌ نیوه‌ یاریگای خۆیان چڕییان دروستكردبوو.

له‌ سه‌ره‌تای وه‌رزه‌وه‌ تیپی ئه‌تله‌تیكۆ زیاتر وه‌كو یانه‌یه‌كی ڕه‌قی به‌رگری ده‌ركه‌وتووه‌، یاخود كه‌متر ده‌كشێنه‌ نیوه‌ یاریگای تیپی دژ و زیاتر ده‌یانه‌وێت له‌ ناوچه‌ی یاریكردنی خۆیاندا بمێننه‌وه‌، كه‌ هه‌ر ئه‌وه‌ش وایكردبوو شه‌وی پێشووتر به‌رگریكارانی تیپی ئه‌تله‌تیكۆ به‌بێ‌ ئه‌وه‌ی ته‌نیا یه‌ك هه‌ڵه‌ بكه‌ن سه‌رجه‌م تۆپه‌ كۆتاییه‌كانی ڕیاڵیان ده‌پچڕاند، كه‌ ئه‌وه‌ش ده‌ری ده‌خست تیپی ئه‌تله‌تیكۆ هێنده‌ی له‌ به‌رگریكردندا به‌ كۆمه‌ڵ یاریی ده‌كه‌ن، ئه‌وه‌نده‌ ناچنه‌ سه‌ر تیپی دژ، ئه‌گه‌ر یاریزانه‌كانی ئه‌و یانه‌یه‌ بچنه‌ سه‌ر تیپی به‌رامبه‌ر، زیاتر به‌بێ‌ تۆپ ده‌كه‌ونه‌ دوای یاریزانه‌كانی تیپی دژ، ئه‌وه‌ش ده‌ریخست سیمۆنی هێنده‌ی به‌ یه‌ك نوخته‌ی یارییه‌كه‌ ڕازیبوو، ئه‌وه‌نده‌ كاری له‌سه‌ر ئه‌وه‌ نه‌كرد سێ‌ خاڵی یارییه‌كه‌ بباته‌وه‌.

ماوه‌ی دوو یارییه‌ زێدان به‌هۆی پێكان و دابه‌زینی ئاستی ستاره‌ سه‌ره‌كییه‌كانی، شێوه‌ یاریی یانه‌كه‌ی گۆڕیوه‌ بۆ (4-4-2)، كه‌ هه‌ردوو یاریزان ڕۆناڵدۆ و بنزیمای له‌ پێشه‌وه‌ جێگیر كردووه‌، تا بتوانن شێوه‌ یاریی به‌ كۆمه‌ڵی تیپه‌كه‌ بپارێزن، هه‌روه‌ها ئیسكۆ ڕۆڵی یاریزانی دڵی ناوه‌ند ده‌بینێت، تا ئه‌ویش بینای هێرشه‌كانی یانه‌كه‌ی بكات. ده‌توانم بڵێم ڕیاڵ له‌ هه‌موو یارییه‌كانی پێشوو باشتر یاریكرد، چونكه‌ زۆر به‌ باشی تۆپه‌كانیان ده‌ست ده‌خست و گوشاریان به‌بێ‌ به‌ربه‌ست دروست ده‌كرد، جگه‌ له‌مانه‌ جاری یه‌كه‌مه‌ ئه‌و تیپه‌ له‌گه‌ڵ یانه‌یه‌كی گه‌وره‌ی وه‌كو ئه‌تله‌تیكۆ، بۆ ماوه‌یه‌كی زۆر ڕووبه‌رێكی به‌رفروانی یاریگاكه‌ به‌ده‌ستیانه‌وه‌ بێت، به‌ڵام له‌ كۆتایدا ئه‌وه‌ی به‌ چاره‌سه‌ر نه‌كراوی مایه‌وه‌، گرفتی گۆڵ نه‌كردن و هێرشبه‌ره‌كان بوو.

ئه‌گه‌رچی به‌ به‌رده‌وامی هێرش ده‌كرایه‌ سه‌ر یاریزانه‌كانی ڕیاڵ له‌ ناوه‌ڕاستی مه‌یدان، به‌ڵام شه‌وی پێشوو سه‌رجه‌م یاریزانه‌كانی ئه‌و هێڵه‌ نموونه‌ی: (كاسمیرۆ، ئیسكۆ، كرۆس) زۆرترین تۆپه‌كانیان به‌ دیقه‌تدا به‌ هاوڕێكانیان، كه‌ ڕێژه‌كه‌ی 95%ـبوو، به‌ڵام به‌ ته‌نیا هی مۆدریج له‌ 89%بوو، كه‌ ده‌كرێت بۆ یارییه‌كانی دواتر زیزۆ زیاتر سوود له‌م كارانه‌ ببینێت، به‌ڵام نابێت ئه‌وه‌ نادیده‌ بگرین، به‌هۆی سیانه‌ی به‌رده‌می به‌رگری ئه‌تله‌تیكۆ، گرفتیش بۆ دواین تۆپه‌كانی ئه‌و یاریزانانه‌ له‌ گه‌یاندنی بۆ ڕۆناڵدۆ و بنزیما دروستبوو بوو.

هه‌رچی ڕۆناڵدۆیه‌ جوڵه‌كانی ته‌ندروست و خراپ نه‌بوو، به‌ڵام ئه‌وه‌ ماوه‌یه‌كه‌ لاوازه‌ به‌رامبه‌ر به‌ به‌رگریكاران، به‌ تایبه‌تی توانای ئه‌وه‌ی نییه‌ وه‌كو یاریزانی نووك له‌نێو به‌رگریكاران یاریی به‌ تۆپه‌وه‌ بكات، شه‌وی پێشوو حه‌وت جار تۆپی پێدرا، ته‌نیا دووجار به‌ لاوازی ئاڕاسته‌یكرد و به‌لای ستوونی گۆڵه‌كه‌دا ڕۆیشت، هه‌روه‌ها ئه‌و ئێستا كێشه‌ی ئه‌وه‌ی هه‌یه‌ زۆر به‌كه‌می له‌ده‌ره‌وه‌ی ناوچه‌ی سزا شووت لێده‌دا، كه‌ پێشتر ئه‌مه‌ی هه‌بوو، جگه‌ له‌مانه‌ به‌خێرایی خۆی ده‌گه‌یانده‌ گۆڵی دژ و گرفتیشی له‌گه‌ڵ له‌مسی كۆتایی تۆپه‌كاندا نه‌بوو.

زێدان شه‌وی پێشووتر به‌ دوو هێرشكار یاریكرد، كه‌ دواتر بنزیمای ده‌ركرد و ئه‌سینسۆی خسته‌ جێگای، كه‌ له‌وكاته‌دا تیپه‌كه‌ی زیاتر پێویستی به‌ یاریزانێكی دیكه‌بوو، له‌ نزیك ناوچه‌ی سزای تیپی به‌رامبه‌ر، یاخود ده‌بوو زێدان كاری له‌سه‌ر ئه‌وه‌ بكردایه‌ به‌ یاریزانێكی زیاده‌ی دیكه‌ ڕووبه‌ری ناوچه‌ی چل مه‌تری به‌رامبه‌ری فه‌راهه‌م بكردایه‌، كه‌چی ئه‌وه‌ی نه‌كرد، به‌ڵام له‌ كۆتایدا ڕیاڵ به‌ پلان و ته‌كتیك سه‌ركه‌وتنی ده‌سته‌به‌ركرد، هه‌رچه‌نده‌ زێدان ده‌بوو كاری زیاتری له‌سه‌ر یارییه‌كه‌ بكردایه‌.

Comments - کۆمێنتت چییە ؟

کۆمێنتت

شەیر بکە لەگەڵ هاوڕێیانت.

دەربارەی نووسەر

Leave A Reply