یوڤێنتۆس ١-٤ ریاڵ مه‌درید | ئه‌فسانه‌که‌ی قه‌ڵای سپی سه‌رکردایه‌تی یانه‌که‌ی کرد بۆ ١٢هه‌م چامپیۆنزلیگ له‌ مێژوودا

DBbD3scXYAEL2U

 

یاریگا-ریاڵ مه‌درید کۆتایی کاردیفی  له‌ به‌رژه‌وه‌ندی خۆی به‌کۆتا هێنا و بۆ ١٢هه‌مین جار له‌ مێژوودا و دووهه‌م ساڵی له‌سه‌ریه‌ک بووه‌ براوه‌ی خولی پاڵه‌وانه‌کانی ئه‌ورووپا.

مه‌دریدی هه‌ڵگری ناسناوه‌که‌ دوای به‌ده‌ستهێنانی لالیگا ، چاوی له‌ گه‌وره‌ترین ناسناوی وه‌رز بوو که‌ خۆی تێیدا باڵا ده‌سته‌ له‌ رووی مێژووه‌وه‌ و وه‌ له‌ کۆتا سێ وه‌رزیشدا دوو جاری دیکه‌ به‌ده‌ستی هێناوه‌. له‌ به‌رامبه‌ردا یوڤێنتۆس ٢١ ساڵه‌ چاوه‌ڕوانی دووباره‌ به‌رزکردنه‌وه‌ی جامه‌که‌یه‌ ، خاڵی به‌هێزیشی  بردنه‌وه‌ بوو له‌ بارسێلۆنا و ئاسته‌ نمونه‌ییه‌که‌ی له‌م وه‌رزه‌ی چامپیۆنزلیگ و خولی ئیتاڵیدا.

یارییه‌که‌ به‌ سه‌ره‌تایه‌کی ئیتاڵی ده‌ستی پێکرد و کوڕانی ئالێگری رێکخراوتر و به‌هێزتر ده‌رکه‌وتن ، له‌ کۆتا خوله‌که‌کاندا  نزیک بوون له‌ گۆڵی یه‌که‌م ، به‌ڵام کریستیانۆ له‌ یه‌که‌م لێدانیدا له‌ یارییه‌که‌ توانی گۆڵی بوفۆن بهه‌ژێنێت و یاریگا بهێنێته‌ جۆش و خرۆش . به‌ڵام هێنده‌ی نه‌برد یوڤێنتۆس له‌ رێگه‌ی ماریۆ مانزۆکیچ  ئه‌نجامه‌که‌ی یه‌کسانکرده‌وه‌ به‌ گۆڵێک که‌ یه‌کێک بوو له‌ جوانترین گۆڵه‌کانی مێژووی خوله‌که‌ .

نیوه‌ی یه‌که‌م به‌ باڵا ده‌ستی یۆڤی و پارێزگاری مه‌درید کۆتایی هات ، به‌ڵام ئه‌زموون و لێهاتوویی قه‌ڵای سپی له‌ نیوه‌ی دووهه‌مدا  جیاوازی له‌ یارییه‌که‌دا دروستکرد و پاش کۆنترۆڵی یاریگا ، کاسیمیرۆ به‌ لێدانێکی دوورهاوێژ گۆڵی دووهه‌می هێنا ، ناوه‌ڕاستکاره‌ به‌ڕازیلییه‌که‌ سوودی له‌ گۆڕانی ئاراسته‌ی تۆپه‌که‌ وه‌رگرت کاتێک به‌ر قاچی سامی خدێرا که‌وت.

پێشکه‌وتنی مه‌درید نه‌بووه‌ هۆی باشتربوونی ئاستی یۆڤی و هه‌وڵدان بۆ یه‌کسانکردنه‌وه‌ی ئه‌نجامه‌که‌. ئاسته‌ به‌رزه‌که‌ی ریاڵ درێژه‌ی کێشا تاوه‌کو کریستیانۆ رۆناڵدۆ گه‌ڕایه‌وه‌ و گۆلی دووهه‌می خۆی و یه‌کلاکه‌ره‌وه‌ی تۆمارکرد. به‌و گۆڵه‌ کریس پێش لیۆ مێسی که‌وت و بووه‌ گۆڵکاری خوله‌که‌ به‌ ١٢ گۆڵ.

رووداوه‌کانی دواتر گۆڕانکارییان له‌ ئه‌نجامدا دروستنه‌کرد تاوه‌کو له‌ کۆتا خوله‌کدا به‌ پاسێکی جوانی مارسێلۆ ، ئاسێنسیۆی لاو گۆڵی چواره‌می هێنا و کۆتا بزماری له‌ تابوتی بیانکۆنێری دا.

به‌م جۆره‌   ریاڵ مه‌درید بووه‌ پاڵه‌وان و خه‌ونه‌که‌ی یوڤێنتۆس و بوفۆن له‌سه‌ر ده‌ستی رۆناڵدۆ  و هاوڕێیانی له‌ گۆڕنرا.

وورده‌کاری ته‌واوی یارییه‌که‌ له‌ یاریگا ستاتس : http://stats.yariga.net/?sport=soccer&page=match&id=2443330

DBbEbBJXsAA8R7S

 

Comments - کۆمێنتت چییە ؟

کۆمێنتت

شەیر بکە لەگەڵ هاوڕێیانت.

دەربارەی نووسەر

سەرنووسەری ماڵپەری یاریگا

Leave A Reply