وتار | خه‌ڵاتی باشترینه‌کانی کوردستانی یاریگا و ره‌خنه‌کان

هێرش جه‌عفه‌ر

 

 

له‌ کۆتاییدا یاریگانێت خه‌ونی له‌ مێژینه‌ی خۆی هێنایه‌ دی و رێوره‌سمی دیاریکردنی باشترینه‌کانی کوردستانی له‌ ئاستێکی به‌رزدا به‌ ئه‌نجام گه‌یاند.وه‌ک پێشبینیمان ده‌کرد  دوای راگه‌یاندنی ئه‌نجامه‌کان   ره‌خنه‌ی ئه‌وه‌ له‌ یاریگا گیرا بۆچی زۆربه‌ی براوه‌کان له‌ یانه‌یه‌ک و ناوچه‌یه‌کی دیاریکراوه‌.

یه‌کێک له‌و هه‌ڵانه‌ی به‌شێک له‌ میدیاکان و خوێنه‌ران تێیکه‌وتن   خراپ به‌کارهێنانی ده‌سته‌واژه‌ی  دیاریکردنی باشترینه‌کانه‌  له‌لایه‌ن یاریگاوه‌.  له‌گه‌ڵ ئه‌وه‌ی پێشتر ئاماژه‌مان به‌وه‌ کردبوو که‌ ده‌نگدان بۆ راپرسییه‌که‌ له‌لایه‌ن  (هانده‌ران + رۆژنامه‌نووسان + یاریزان و راهێنه‌ران)  ـه‌وه‌ بووه‌ به‌ڵام زۆرێک که‌وتنه‌ ئه‌و هه‌ڵه‌یه‌ی  که‌ گوایه‌ یاریگا براوه‌کانی ده‌ستنیشانکردووه‌.

به‌و پێیه‌ی یاریگا ماڵپه‌ڕێکه‌ له‌ نێو خوێنه‌رانیدا به‌ سه‌ربه‌خۆ و بێ لایه‌ن ناوی ده‌رکردووه‌  به‌ پێویستم زانی روونکردنه‌وه‌ له‌سه‌ر شێوازی راپرسییه‌که‌ و هۆکاری بردنه‌وه‌ی خه‌ڵاته‌کان له‌لایه‌ن کاندیده‌کانی شاری هه‌ولێر بخه‌مه‌ روو.

ئێمه‌ له‌ ده‌ستنیشانکردنی کاندیده‌کاندا   ، له‌سه‌رجه‌م یانه‌کان و شاره‌ جیاوازه‌کاندا یاریزان و راهێنه‌ر و ناوبژیوانمان هه‌ڵبژاردبوو ، وه‌ جگه‌ له‌وه‌ی رێژه‌ی ٣٠%ی ماڵپه‌ر بۆ ته‌واوی خوێنه‌ران کراوه‌بوو ، هه‌روه‌ها  فۆرمی تایبه‌تی ده‌نگدانمان گه‌یانده‌ سه‌رجه‌م یانه‌کانی خولی پله‌ نایاب له‌ سه‌رجه‌م شاره‌کان. وه‌ بانگهێشتی ده‌نگدان له‌ رێگای فۆرم و په‌یوه‌ندییه‌وه‌ زۆربه‌ی رۆژنامه‌نووسانی سه‌رجه‌م شاره‌کان  گه‌یشتووه‌.

به‌ڵام به‌له‌به‌رچاوگرتنی ئه‌و راستییه‌ی یانه‌ی هه‌ولێر له‌ وه‌رزی رابردوودا بووه‌ پاڵه‌وانی خولی نایابی کوردستان و یانه‌ی پێشمه‌رگه‌ی هه‌ولێریش پله‌ی دووهه‌می به‌ده‌ستهێنابوو ، شتێکی ئاسایی بوو که‌ ژماره‌یه‌کی زیاتری کاندید له‌و دوو یانه‌یه‌ بن.  به‌ڵام به‌داخه‌وه‌  هه‌ندێک ئه‌وه‌یان کرده‌ بیانوو  بۆ ئه‌وه‌ی کاره‌که‌ی یاریگا بخه‌نه‌ قاڵبی شارچێتی و لایه‌نداری.

له‌ شاری سلێمانی ، یانه‌ی نه‌ورۆز  به‌وپه‌ڕی گه‌رمییه‌وه‌ به‌خێرهاتنی راپرسییه‌که‌ی کرد و سه‌رجه‌م یاریزانان و راهێنه‌ر ده‌نگیاندا . به‌ڵام سیروانی نوێ ئاماده‌نه‌بوون به‌شداری بکه‌ن. به‌شدارینه‌کردنی سیروانی نوێ و به‌شێک له‌ میدیاکارانی سلێمانی له‌ راپرسییه‌که‌دا    نا هاوسه‌نگه‌یان له‌ رێژه‌ی ده‌نگه‌کاندا دروست کرد.  یه‌کێکی دیکه‌ش له‌ هۆکاره‌کان ئه‌وه‌بوو شاری هه‌ولێر  چوار یانه‌ی له‌ خولی نایابی پێشمه‌رگه‌  یاری ده‌کات و له‌ سلێمانی ته‌نها دوو یانه‌ له‌و خوله‌دا به‌شدارن.

جگه‌ له‌و شه‌ش خه‌ڵاته‌ی که‌ له‌ رێگه‌ی ده‌نگدان دیاریکران ، یاریگا پێنج خه‌ڵاتی تایبه‌تی هه‌بوو که‌له‌لایه‌ن خودی ماڵپه‌ڕه‌وه‌ بڕیاریان لێدرابوو. تێیدا هانده‌رانی سه‌ید سادق له‌ سنووری سلێمانی و فۆتۆگرافه‌ر  یوسف که‌رکوکی له‌ سنوری که‌رکوک خه‌ڵاتکران .

به‌رزکردنه‌وه‌ی رۆشنبیری وه‌رزشی  پێویسته‌ ئه‌رکی هه‌موومان بێت به‌ تایبه‌ت میدیاکان.  ئه‌وه‌ی تێبینیم کرد دوای راگه‌یاندنی پێکهاته‌ی نمونه‌یی فیفا بۆ ساڵی ٢٠١٦ ، زۆربه‌ی میدیاکان و هانده‌ران  که‌وتنه‌ هه‌مان هه‌ڵه‌وه‌ و ره‌خنه‌یان له‌ فیفا گرت که‌ رۆزبه‌ی ده‌رچووه‌کان له‌ ریاڵ مه‌درید و بارسێلۆنا بوو. له‌کاتێکدا ده‌ستنیشانکردنی ئه‌و پێکهاته‌یه‌ش له‌لایه‌ن ریکخراوه‌ی فیفپرۆوه‌ بوو که‌ ٤٥ هه‌زار یاریزانی پیشه‌گه‌ر تێیدا ئه‌ندامه‌ و مافی ده‌نگدانیان هه‌یه‌.

 

به‌ پێویستیشی ده‌زانین سوپاسی سه‌رجه‌م ئه‌و به‌ڕێزانه‌ بکه‌ین که‌ ره‌خنه‌ و پێشنیاری دروستکه‌ریان هه‌بووه‌ و  هاوکارمانن تاوه‌کو له‌ ساڵانی داهاتوو به‌شێوه‌یه‌کی باشتر  به‌ڕێوه‌ی ببه‌ین.

 

به‌ داتا و رێژه‌  سه‌رجه‌م ده‌نگه‌کان ببینن

Yariga Awards

 

Yariga Awards

Yariga Awards

 

شەیر بکە لەگەڵ هاوڕێیانت.

دەربارەی نووسەر

سەرنووسەری ماڵپەری یاریگا

Leave A Reply