سه‌ربازه‌ ونه‌كانی دێربی ئینگلته‌را

8تایبه‌ت به‌ یاریگانێت

كاتژمێر (10)ی ئه‌مشه‌و، دێربی ئینگلته‌را له‌ نێوان (لیڤه‌رپول و مانچێسته‌ر یونایتد) له‌ نێو یاریگای (ئه‌نفێڵد رۆد)ی تایبه‌ت به‌ یانه‌ی یه‌كه‌م ئه‌نجام ده‌درێت، له‌ درێژه‌ی رووماڵه‌كانی یاریگا بۆ ئه‌م یاریه‌ گرنگه‌، لێره‌دا باسی ئه‌و كه‌سانه‌ ده‌كه‌ین كه‌ له‌ ته‌نیشت كلۆپ و مۆرینهۆ له‌سه‌ر كورسی یه‌ده‌گ دانیشتوون، هه‌وڵده‌دین رۆڵ و به‌رپرسیارێتیان له‌م راپۆرته‌دا بخه‌ینه‌ ڕوو:-

لیڤه‌رپوول

5

یاریده‌ده‌ری یه‌كه‌می كلۆپ: زلیكۆ بوڤاچی بۆسنی، ته‌مه‌نی 55 ساڵه‌، له‌گه‌ل كلۆپ پێكه‌وه‌ له‌ یانه‌ی ماینزی ئه‌ڵمانی یاری كردووه‌، پاشان له‌سه‌ره‌تای ده‌ستبه‌كاربوونی كلۆپ وه‌ك ڕاهێنه‌ری ماینز، بوو به‌ یاریده‌ده‌ری یه‌كه‌می، له‌و ساته‌ به‌دواوه‌ كلۆپ رۆتبێته‌ هه‌ر یانه‌یه‌كه‌، بوڤاچی ده‌سته‌راسی بووه‌، به‌ ئه‌قڵی به‌ڕێوه‌بردن و جێبه‌جێكاری لیڤه‌رپوول داده‌نرێت و شاره‌زایه‌كی زۆری له‌ لایه‌نی ته‌كتیك هه‌یه‌.

یاریده‌ده‌ری دووه‌می كلۆپ: پیته‌ر كراڤیتزی ئه‌ڵمانی، ته‌مه‌نی 44 ساڵه‌، هه‌رگیز یاری تۆپی پێی ئه‌نجام نه‌داوه‌، ناسناوی (چاو)ی لیڤه‌رپوولیان پێ به‌خشیوه‌، كه‌ كاری شیكردنه‌وه‌ی یاریه‌كانه‌.

ڕاهێنه‌ری گۆڵچی: جۆن ئاكتێربێرگی هۆڵه‌ندی، ته‌مه‌نی 45 ساڵه‌، له‌ ساڵی 2009 په‌یوه‌ندی به‌ لیڤه‌رپوول كردووه‌، له‌ ساڵی 2011 وه‌ك ڕاهێنه‌ری گۆڵچی تیپی یه‌كه‌م ده‌ستنیشان كراوه‌.

به‌رپرسی توانای جه‌سته‌یی و ڕاهاتن: ئاندریه‌س كۆرنمایه‌ری ئه‌ڵمانی، ته‌مه‌نی 42 ساڵه‌، له‌ مانگی 7 ڕابردوو كلۆپ هێنایه‌ ناو ستافی ڕاهێنه‌ران، ئه‌ركی یارمه‌تیدانی یاریزانانه‌ بۆ جێبه‌جێكردنی پلانه‌كانی كلۆپ و گونجاندنیان له‌گه‌ڵ شێوزای یاری كردنی یۆرگن كلۆپ، كه‌ به‌ (gegenpressing) ناسراوه‌.

به‌رپرسی خزمه‌تگوزاری پزیشكی: ئاندرێی ماسێی ئایرله‌ندی، له‌ ساڵی 2013 وه‌ك پزیشكی ئه‌كادیمیای یانه‌ی لیڤه‌رپوول ده‌ستبه‌كار بوو، پاشان له‌ ساڵی 2014 به‌رزكرایه‌وه‌ بۆ لای ده‌سته‌ی پزیشكی تیپی یه‌كه‌م، دواتر له‌ ساڵی 2015 بوو به‌ به‌رپرسی خزمه‌تگوزاری پزیشكی یانه‌ی لیڤه‌رپوول.

به‌رپرسی چاره‌سه‌ری سروشتی: ئاندی رێنشار، له‌ ساڵی 2009 په‌یوه‌ندی به‌ یانه‌ی لیڤه‌رپووله‌وه‌ كردوه‌، له‌م هاوینه‌دا بوو به‌ به‌رپرسی چاره‌سه‌ری سروشتی یانه‌كه‌، كه‌ په‌رپرسیاری ڕێكخستنی چاره‌سه‌ری سروشتی ئه‌كادیمیا و تیپی یه‌كه‌می یانه‌كه‌.

پزیشكی چاره‌سه‌ری سروشتی: ریچی پارتریجی ئایرله‌ندی، ته‌مه‌نی 36 ساڵه‌، یاریزانی پێشووتری یانه‌ی لیڤه‌رپووله‌، له‌ ساڵی 2011 وازی له‌ یاری كردن هێنا، ئه‌مساڵ له‌ ئه‌كادیمیای یانه‌كه‌وه‌ به‌رزیان كرده‌وه‌ بۆ ناو ده‌سته‌ی چاره‌سه‌ری سروشتی تیپی یه‌كه‌م.

مانچێسته‌ر یونایتد

6

یاریده‌ده‌ری یه‌كه‌می مۆرینهۆ: رۆی فاریای پۆرتوگالی، ته‌مه‌نی 41 ساڵه‌، له‌ یانه‌ی پۆرتۆ وه‌ك ڕاهێنه‌ری جه‌سته‌یی له‌گه‌ڵ مۆرینهۆ كاری ده‌كرد، پاشان مۆرینهۆ كه‌ جاری یه‌كه‌م هاته‌ چێڵسی كردی به‌ یاریده‌ری خۆی، هه‌روه‌ها له‌ یانه‌كانی (ئینته‌ر میلان، ریاڵ مه‌درید و چێڵسی دووه‌م جار) یاوه‌ری بوو، مۆرینهۆ زۆر ستایشی ده‌كات و به‌ شوێنگره‌وه‌ی خۆی ناوزه‌دی ده‌كات، ده‌ڵێت:- ئه‌گه‌ر سبه‌ینێ بیه‌وێت ببێت به‌ ڕاهێنه‌ر، ئه‌وا ئه‌و زۆر ئاماده‌یه‌ بۆ ئه‌نجامدانی ئه‌و كاره‌ به‌ باشترین شێوه‌.

یاریده‌ده‌ری دووه‌می مۆرینهۆ: سیلڤیۆ لۆرۆی پۆرتوگالی، ته‌مه‌نی 57 ساڵه‌، گۆڵچی پێشووتری پۆرتوگال بووه‌، له‌ پۆرتۆ له‌گه‌ڵ مۆرینهۆ وه‌ك ڕاهێنه‌ری گۆڵچی كاری ده‌كرد، ئێستا له‌ مان یونایتد مۆرینهۆ كردوویه‌تی به‌ ڕاوێژكاری خۆی، كاری سه‌ره‌كی به‌ ڤیدیۆ شیكاری یاریه‌كانی مان یونایتد و ركابه‌ره‌كانی ئه‌نجام ده‌دات.

ڕاهێنه‌ری توانای جه‌سته‌یی: كارلۆس لالینی ڤێنزه‌وێلی، ته‌مه‌نی 46 ساڵه‌، له‌ ریاڵ مه‌درید مۆرینهۆ هێنایه‌ ستافی ڕاهێنه‌ران، پاشان یاوه‌ری بوو له‌ چێڵسی، ئێستا له‌ مان یونایتد، به‌رپرسیاری ڕاهاتن و گونجاندنی یاریزانانی مان یونایتده‌ له‌گه‌ڵ پلان و شێوازی یاری كردنی مۆرینهۆ.

ڕاهێنه‌ری گۆڵچی: ئیمیلیانۆ ئه‌لڤارێزی ئیسپانی، ته‌مه‌نی 44 ساڵه‌، ڕاهێنه‌ری پێشووی گۆڵچی ئه‌تله‌تیكۆ مه‌درید بووه‌، ده‌رخه‌ری تواناكانی ده‌یڤد دی خیای گۆڵچی ئێستای مان یونایتده‌.

ریكاردۆ فۆرمۆسینهۆی پۆرتوگالی، ته‌مه‌نی 60 ساڵه‌، له‌گه‌ڵ مۆرینهۆ له‌ هه‌ردوو یانه‌ی پۆرتۆ و ریاڵ مه‌درید كاری كردووه‌، ئه‌ركی ده‌ستنیشان كردنی خاڵی به‌هێز و لاوازی تیپی نه‌یاره‌.

به‌رپرسی پزیشكی وه‌رزشی و زانست: ستیڤ مه‌كنالی، ساڵی 2006 له‌ ئه‌كادیمیای یانه‌ی لیڤه‌رپووله‌وه‌ی په‌یوه‌ندی به‌ ستافی پزیشكی مان یونایتده‌وه‌ كردووه‌، به‌رپرسیاری چاره‌سه‌ركردنی پێكان و نه‌خۆشیه‌كانی كه‌مپی مه‌شقه‌كانی یانه‌كه‌یه‌.

به‌رپرسی چاره‌سه‌ری سروشتی: نیل هاف، پاش 15 ساڵ كاركردن له‌ ژێر ده‌ستی دكتۆر (رۆب سوایر)، نیل هاف له‌ ساڵی 2014 وه‌ك به‌رپرسی چاره‌سه‌ری سروشتی یانه‌ی مان یونایتد ده‌ستنیشان كرا. له‌ كاتی پێكانی یاریزانێكی مان یونایتد له‌ نێو یاریگادا، رۆب یه‌كه‌م كه‌س ده‌بێت له‌ به‌هاناوه‌ چوونی یاریزانه‌كه‌.

کۆمێنتی تۆ؟
شەیر بکە لەگەڵ هاوڕێیانت.

دەربارەی نووسەر

Leave A Reply