وتار| درامای هەموومان ئاو فرۆشین!

1
 نووسینی: زاگرۆس نانەكەلی
دڕامای هەموومان ئاو فرۆشین!. زاگرۆس نانەكەلی لەوانەیە بپرسن دڕاما و ئاو فرۆشتن و وەرزش ومیدیای وەرزشی چ پەیوەندییەكیان پێكەوە هەیە؟ ئەی ناڵێن جیهان شانۆیە هەموومان كارەكتەرین و رۆڵی خۆمان دەبینین؟ بەڵام ئەم دڕامایەی من نە فیلمە ونە شانۆ ونەدراِمای تیڤییەكانیشە،بەڵكو واقیعە و رووداوێكی راستەقینەی ژیانی وەرزشكار ومیدیاكاری وەرزشی كوردە. واقیعێكە هەنگوین دەكات بە ژەهر،كەواتە با بەهێمنی و لەسەرخۆ ئەم دراِمایە راستەقینەیە بخوێنەوە . لەكۆنەوە گوتوویانە نانی كاسبی برژاوە،كاسبی جەوهەری مرۆڤە،ئەمڕۆ نان وبژێوی ژیان قورس بووە،هۆكار زۆرن،گرنگ ئەوەیە بە سەربەرزی بژیت و لوقمەی حەڵاڵ بخەیتە زاری مناڵەكانت،تەنها كاری نەشیاو و بەدكاری مایەی شەرمەزارییە،جا هەر كارێك بكەی شەرم نیە و زۆر ئاساییە،بەهۆی قەیرانە پڕۆكێنەرەكەی تاكی كۆمەڵگای ئێمەوە بەناچاری دەبێت دوای دەوام كارێكی تر بكەیت،نموونەی رێزلێنان لە وەرزشكارێَكی دێرین و فۆتۆگرافەرێكی وەرزشی دەكەین بەچەند دیمەنێك تا دراِمایە راستەقینە تاڵەكە.هەڵینهێنجین و بزانین ئێمە ئێستا لەكوێی ئەو تراژیدیایەداین. دیمەنی یەكەم نەجات عەبدولواحید یەكێك لە ساڵانی حەفتا وهەشتاكان یەكێك بوو لەباشترین یاریزانەكانی تۆپی پێی هەولێر و كوردستان ،وەرزشوانە دێریینەكانی دهۆك وسلێمانی وكەركووك وهەولێر زۆر بەباشی دەیناسن. ئەو یاریزانە دێرینە دوای ئەوەی وازی لەیاریكردن هێنا لە رێزلێنانێكی شایستەدا كردیان بە ئاو فرۆش!!! ،لەبەرنامەی ستۆدیۆی وەرزش میوانداریمان كرد بە ناچاری كاكە نەجاتیان لە لیژنەی ئۆلۆمپی دامەزراند،بەڵام ئێستا لیژنەی ئۆلۆمپی سەد خۆزگە بە كاك نەجات. دیمەنی دووەم لە 31/7/2016 بەرێككەوت چوومە لای كۆتری ئاشتی و ناو (بازاڕی مۆبایل فرۆشان) چاوم بەهاوپیشەیەكی خۆم كەوت،كە ماوەیەكی زۆربوو وەكو داوەری تۆپی پێ خزمەتی وەرزشی وڵاتەكەی دەكرد،دوای وازهێنانی رەوەو پیشەی فۆتۆگرافەری وەرزشی هەنگاوی نا وشوێنی خۆی كردەوە،بەڵام بەرلەماوەیەك بەهۆی نەساغی خێزان ومنااڵەكانی هەروەها بەهۆی ئەو قەیرانە حەیرانەی خۆمان كە موچەیان كرد بە نیوە عومر! لەبەر باری خراپی گوزەرانی بەناچاری دوكانێكی وێنەگرتنی كردەوە،دەڵێن (مرۆڤی هەژار و بێ بەخت ماستاو بخواتەوە ددانی دەشكێ)!، لەوكوردستانە گەورە وئایز و ئەمن و ئەمانەتەكەی خۆمان،دزی نالەبار دوكانەكەی كاكە (ئەردەلان هەولێری) فۆتۆگرافەری وەرزشی تاڵانكرد!منیش هەناسەیەكی قوڵم هەڵكێشا و لەناكاو و لەبازاڕە قەرباڵغە یەكێك بانگی كردم ،خۆزگە ئاوەڕم نەدابوایەوە،سەیرم كرد كاكە ئەردەلان هەولێری داوەر ومیدیاكاری وەرزشی ئاو دەفرۆشێت!. منیش بێ دوودڵی چوومەلای وباوەشمان بەیەكدا كرد و ئاوێكی ساردی پێدام،بەڵام ناخم بەو ئاوە ساردەش فێنك نەبووەوە،ئەردەلان هەولێری ئەوانەی سەرەوە ی هەموو بۆ باس كردم،من ئەم بەرێزانە میدالی ئاو فرۆشییان پێ بەخشرابێت؟. دیمەنی سێیەم من خەمی خۆم ونەوەی ئێستام نیە،بەڵكو ئەوەی لەدوای ئێمە دێت،چۆن ببێتە وەرزشكار یان میدیاكاری وەرزشی كە پاداشتەكەی ئاو فرۆشتن بێت؟ من نازانم بۆ دڵم ئەم وەرزشكار ومیدیارە وەرزشییە دڵم بۆیان ژان بكات كە لە كۆتاییدا ئاو دەفرۆشن،یاخود حەسوودی وئیرەییان پێ ببەم؟ نازانم واقم وڕماوە ،دڵنیام لە وڵاتە ئازیز وپڕخێر وبێرەكەی مندا گەر ئاراستەكان وابڕوات ،ئەم وەرزشكار ومیدیاكارە وەرزشییە دەبێت ئیرەییان پێ ببەین چونكە لەوانەیە ئەوان بۆ شوێنی ئاو فرۆشتن (روكن) ێكیان دەست كەوتبێت،بەڵام ئێمەی دوای ئەوان نەك سەرشەقام بگرە بستێكی (فەرع) ێكیشمان دەست نەكەوێت بۆ ئاو فرۆشتن!،چونكە دڵنیام لەكۆتاییدا دەبێت یان بو بستەی (فەرع ) ە كە رازی بین ویاخود ببین بە شاگردی ئەوان !،چونكە لەكۆتایی شوێنێك بۆ ئێمە نامینێت ئاویشی تیا بفرۆشین . دەبێت كێ بەرپرس بێت لە وەرشكاران ومیدیاكارانی وەرزشی؟ پرسیارێكە لە سەرەتای راپەڕینی ساڵی 1991 دەكرێت و تا ئێستاش وڵاممان بەدەست نەگەیشتووە،بۆیە بەهاوپیشەكەم و وەرزشكارە دێرینەكە دەلێم خەم مەخۆن، توڕە و بێزامەبن،دڵ و دەروونتان پاك وسارد و بێ گەرد هاوشێوەی ئاوەكانتان ، كار وا بڕوات لە كۆتاییدا (هەموومان ئاو فرۆشین).
شەیر بکە لەگەڵ هاوڕێیانت.

دەربارەی نووسەر

Leave A Reply