٨ ئاماری ئه‌م وه‌رزه‌ی خوله‌کانی ئه‌ورووپا که‌ نه‌تزانیوه‌

european_football

یاریگا-له‌م بابه‌ته‌دا  هه‌شت ئامار و داتای ئه‌م وه‌رزه‌دان له‌سه‌ر ئاستی خوله‌کانی ئه‌ورووپا بۆ ده‌خه‌ینه‌ ڕوو که‌ ئاگاداریان نیت.

 

کام یانه‌ زۆرترین یاریزانی ده‌ره‌وه‌ی وڵاته‌که‌ی هێناوه‌؟

له‌ کۆی سه‌رجه‌م ٣١ خوله‌که‌ی ئه‌ورووپادا  ، خولی ئینگلیزی دووهه‌مه‌ له‌ رێژه‌ی یاریزانانی بێگانه‌ که‌ له‌و خوله‌دا یاری ده‌که‌ن.  به‌ڵام له‌سه‌ر ئاستی یانه‌کان  یانه‌یه‌کی سلۆڤینی له‌ پله‌ی یه‌که‌م دێت , به‌ جۆرێک ته‌نها له‌ کرواتیاوه‌ ١٨ یاریزانی گواستۆته‌وه‌ له‌گه‌ڵ چه‌ند یاریزانێکی دیکه‌ی  بۆسنه‌ و ئه‌لبانیا و ئیسپانیا و مۆنتینیگرۆ و نه‌مسا. رێژه‌ی یاریزانی بێگانه‌ له‌و یانه‌ه‌دا ٨٨% ـه‌

له‌ نێو یانه‌ به‌ناوبانگه‌کانیشدا رۆما له‌ پله‌ی یه‌که‌مه‌ به‌ ٨٥% و    چێڵسی له‌نده‌نی ٢١ یاریزانی تیپی یه‌که‌می بێگانه‌ن  به‌ ریژه‌ی ٨٣.٣%.

 

کام یانه‌  زۆرترین یاریزانی به‌ ته‌مه‌نی تێدایه‌ ؟

لێکۆڵینه‌وه‌کانی CIES ده‌ریان خستووه‌ له‌ نێو یانه‌کانی ئه‌ورووپادا ، کیێڤۆی ئیتاڵی خاوه‌ن زۆرترین یاریزانی به‌ته‌مه‌نه‌. به‌ جۆرێک رێژه‌ی گشتی ته‌مه‌نی له‌و یانه‌یه‌دا ٣٠.٦ ساڵه‌.  بۆ نموونه‌ ئه‌لبانۆ بیزاری ٣٨ ساڵه‌ و داریۆ دانیێلی و سێرجیۆ پێلیسیه‌ر و جیناردۆ ساردۆ سه‌رجه‌میان ٣٦ ساڵن. له‌ پاڵ چه‌ند یاریزانێکی دیکه‌ی ٣٥ و ٣٤ ساڵ.

Chievo

له‌گه‌ڵ ئه‌وه‌شدا له‌ پله‌ی ١٤هه‌م دێن که‌ ره‌نگه‌ خراپ نه‌بێت بۆ یانه‌یه‌کی پڕاوپڕ له‌ یاریزانی ماندوو به‌ ته‌مه‌ن. ئه‌وه‌ش له‌ یاد نه‌که‌ین لوکا تۆنی  ته‌مه‌نی ٣٨ ساڵه‌ و پارساڵ به‌ هاوبه‌شی له‌گه‌ڵ ئیکاردۆ گۆڵکاری خولی  ئیتاڵی بوو.

له‌ پله‌ی دووهه‌میش یانه‌ی ئاکسیر به‌له‌دیه‌ سپۆری تورکی دێت که‌ تێکڕای ته‌مه‌نی یاریزانه‌کانی ٢٨.٩ ساڵه‌.

 

به‌ پێچه‌وانه‌ی ئه‌وان یانه‌کانی هایدوک سپلیتی کرواتی و سینیکای سلۆڤینی خاوه‌ن گه‌نجترین پێکهاته‌ن به‌ ٢٢.٧ ساڵ . له‌ نێو یانه‌کانی پریمه‌رلیگ تۆتنهام لاوترینه‌ به‌ ٢٤.٤ ساڵ و لیڤه‌رپوول دوای ئه‌و دێت به‌ ٢٥ ساڵ.

 

کێ  درێژترین پێکهاته‌ی هه‌یه‌

هه‌رکاتێک باسی یاریزانی باڵا به‌رز ده‌کرێت زۆربه‌مان  خه‌یاڵمان ده‌چێت بۆ پیته‌ر کراوچ.

له‌وه‌دا هه‌ڵه‌ نین و یانه‌ی ستۆک ستی  که‌ کراوچ یاری بۆ ده‌کات  ، خاوه‌ن به‌رزترین رێژه‌ی باڵایه‌ له‌ نێو یانه‌کانی پریمه‌رلیگدا به‌ ١٨٤.٨ سم بۆ هه‌ر یاریزانێک ( کراوچ ٢٠٣ سم) ـه‌.   له‌سه‌ر ئاستی سه‌رجه‌م ئه‌ورووپاش یاریزانانی وۆڵڤسبۆرگی ئه‌ڵمانی یه‌که‌م که‌سن که‌ ده‌زانن بارانه‌ و تێکڕای به‌رزی باڵایان ١٨٧ سم ـه‌.   نیکڵاس بیێندتنه‌ری یاریزانی ئه‌و یانه‌یه‌ باڵای ١٩٣ سم ـه‌.

هه‌روه‌ها یانه‌ی لودگۆریتس رازگاردی بولگاری  بچووکترین یاریزانه‌کانی له‌ خۆی کۆکردته‌وه‌ و تێکڕای باڵای یاریزانه‌کانی ١٧٨ سم ـه‌.  بارسێلۆنای ئیسپانی له‌ پله‌ی پێنجه‌می  کورت باڵاترین یانه‌کانی ئه‌ورووپایه‌.    ئێڤه‌رتۆن و مان ستیش یه‌که‌می پریمه‌رلیگن له‌و رووه‌وه‌.

 

 

کێ زۆرترین یاریزانی نێوده‌وڵه‌تی هه‌یه‌ ؟

به‌جیاوازییه‌کی زۆر  خولی پریمه‌رلیگ زۆرترین یاریزانی نێوده‌وڵه‌تی تێدا یاری ده‌کات (ئه‌و یاریزانانه‌ی یاری بۆ هه‌ڵبژارده‌ فه‌رمییه‌کان ئه‌نجام ده‌ده‌ن).

٤١.٤%ی  یاریزانانی پریمه‌رلیگ بانگهێشتی هه‌ڵبژارده‌ جیهانییه‌کان کراون له‌ سه‌ره‌تای ئه‌م وه‌رزه‌وه‌ تا ئێستا.  خولی ئه‌ڵمانی له‌ پله‌ی دووهه‌م دێت به‌ رێژه‌ی ٣٠.٩%ی یاریزانه‌کانی. له‌دوای ئه‌وانیش ئیتاڵیا و رووسیا  و فه‌ڕه‌نسا و تورکیا دێن. به‌ شێوه‌یه‌کی چاوه‌ڕواننه‌کراویش  لالیگا له‌ پله‌ی حه‌وته‌م دایه‌.

سلۆڤینیا  خراپترینه‌ به‌ رێژه‌ی ٢%

David de Gea

 

کام خول  زۆرترین گواستنه‌وه‌ ئه‌نجام ده‌دات

ره‌نگه‌ خولی صربی له‌ به‌ناوبانگترین خوله‌کانی جیهان نه‌بێت به‌ڵام یاریزانه‌کانی  ئه‌رز به‌ خۆیان ناگرن و هه‌ر ١.٧ ساڵێک یانه‌یه‌ک ده‌گۆڕن.

خولی ئینگلیزی له‌ پله‌ی یه‌که‌می ئه‌و خولانه‌ دێت که‌ یاریزانه‌کانی بۆ زۆرترین ماوه‌ ده‌مێننه‌وه‌، ره‌نگه‌ ئه‌مه‌ش په‌یوه‌ندی به‌ باشی موچه‌وه‌ هه‌بێت له‌ پریمه‌رلیگ. له‌ دوای ئینگلته‌را نه‌رویج دووهه‌مه‌ و رووسیا سێهه‌م.

بۆ یانه‌کانیش له‌  سیسکا مۆسکۆی رووسی   یاریزانان بۆ زۆرترین ماوه‌ ده‌مێننه‌وه‌. یاریزانه‌کانی وه‌ک ئه‌لێکسی بیریزوتسکی  ڤاسیلی بیتروزوسکی (دوانه‌ن)  زیاد له‌ ١٥ ساڵه‌ یاری بۆ ئه‌و یانه‌یه‌ ده‌که‌ن و بران.   سێرجی ئگناشێڤیج  ١٠ ساڵ زیاتره‌.  ئه‌مه‌ش رێژه‌ی مانه‌وه‌ی یاریزانانی له‌و یانه‌یه‌ بۆ ٥.٦٧ ساڵ به‌رزکردۆته‌وه‌. له‌ پله‌ی دووهه‌مدا ریال سۆسیدادی ئیسپانی ده‌بینرێت به‌ ٤.٦٢ ساڵ.

 

ئه‌لێکسی بیروتوزسکی

 

 

کام خول زۆرترین یاریزانی لاوی هێناوه‌ته‌ تیپی یه‌که‌م ؟

خوله‌کانی تورکی و قوبرسی و یۆنانی و ئیسپانی  که‌مترین چانسیان داوه‌ به‌ یاریزانی ئه‌کادیمیاکانیان.  له‌دوای ئه‌وانیش پریمه‌رلیگ دێت به‌ رێژه‌ی ٠.٤ یاریزان بۆ هه‌ر یانه‌یه‌ک.

خولی ئۆکرانی زۆرترین هه‌لی داوه‌ته‌ یاریزانی لاوه‌ و به‌ تێكڕای ٢.٢٩ یاریزان بۆ هه‌ر یانه‌یه‌ک

 

کێ زۆرترین یاریزانی خۆی به‌کارده‌هێنێت؟

 

سیاسه‌تی ئه‌تله‌تیک بلباوی ئیسپانی که‌ ته‌نها یاریزانی هه‌رێمی باسک به‌کارده‌هێنێت ، بێ رکابه‌ر ئه‌و یانه‌یه‌ی کردووه‌ته‌ خاوه‌ن پله‌ی یه‌که‌می ریزبه‌ندی به‌کارهێنانی زۆرترین یاریزانی ناوخۆ.    به‌ڵام ته‌نها ٦٣%ی یاریزانانی بلباو  له‌ ناوخۆی یانه‌که‌دا په‌روه‌رده‌ بوون و به‌وه‌ش له‌ پله‌ی چواره‌می ئه‌ورووپان.

Inaki Williams

یانه‌ی گۆمێل که‌ له‌ ساڵی ٢٠١٢ به‌شداری یۆرۆلیگی کرد رێژه‌ی ٩١.٧%ی یاریزانه‌کانی له‌ ئه‌کادیمیای خۆی پێگه‌یشتبوون.

 

 

کێ زۆرترین یاریزان ده‌کڕێت ؟

سه‌ره‌ڕای  چالاکییه‌ زۆره‌که‌ی پریمه‌رلیگ له‌مساڵدا بۆ هێنانی یاریزانی نوێ، به‌ڵام ١٨هه‌می ٣١ خوله‌که‌ی ئه‌ورووپان به‌ ٩.٨ یاریزانی نوێ بۆ هه‌ر یانه‌یه‌ک.

پله‌ی یه‌که‌م بۆ خولی ڕۆمانییه‌ که‌ هه‌ر یانه‌یه‌ک به‌ تێکڕای ١٤ یاریزانی کڕیووه‌ له‌ یه‌ک ساڵدا، ئه‌مه‌ش هۆکاره‌که‌ی بۆ ئه‌وه‌ ده‌گه‌ڕیته‌وه‌ ته‌نها له‌ پارساڵدا ٤٤ جار له‌ خولی پله‌ یه‌کی رۆمانیدا راهێنه‌ر گۆڕدراوه‌.

له‌سه‌ر ئاستی یانه‌کانیش بۆلۆنیای ئیتاڵی ٢٣ یاریزانی کڕیووه‌ و له‌ پله‌ی یه‌که‌مدا. واتفۆرد به‌ ١٧ یاریزان له‌ پله‌ی یه‌که‌می پریمه‌رلیگه‌.

کۆمێنتی تۆ؟
شەیر بکە لەگەڵ هاوڕێیانت.

دەربارەی نووسەر

سەرنووسەری ماڵپەری یاریگا

Leave A Reply