کەریم بێنەزم و بێخێر
سيروان حسن / سليمانى
یەکێک لە ڕێکەوتە ناشایستەکانی تۆپی پێ ئەوەیە کەریم بنزیمە لە شوینی ڕۆناڵدۆی دیاردە یاری ئەکات و نەگبەتی ھاندەرانی ڕیاڵ لەوەدایە لەو زیاتر لەتیپەکەدا ماوەتەوە و قەدەریش وایکردوە لە سەردەمی کەریمدا (ھەرچەند کەریمیش نیە ) ژمارەی چامپیۆنزلیگەکانی ڕیاڵ زیاترە لە سەردەمی دیاردە .
ساڵانێکی زۆرە بنزیمە لەڕیاڵ یاری ئەکات و ھەمیشە جێگای ڕەخنە و گلەیی ھاندەران و چاودێران بووە بەڵام ھەر ڕاھێنەرێک ھاتوە وڕۆشتووە ئەم ھەر جێگای پارێزراو بووە لە پێکھاتەی تیپەکەدا وبگرە ھەر بۆندێکیان کردبێت لەگەڵ ھەر ھێرشبەریکدا بۆ یەدەگی کەریم بووە و یاریزانە تازەکە ھاتووە و ڕۆشتووە و بنزیمە ھەر لەجێی خۆیەتی .
جاران ئەیانوت کەریم ڕێ خۆشکەر و ئاسانکارە بۆ ڕۆناڵدۆی پرتوگالی بەڵام دەرکەوت کە وانیە چونکە بێ کەریم لە خولێکی قورستر ڕۆناڵدۆ ھەر گۆڵکارە و ھەر کێبڕکێکەری گۆڵکاری خولی ئیتاڵیە. پارساڵ دوای ڕۆشتنی دۆن ماریانۆ ( یەک لە باشترین گۆڵکارەکانی خولی فەڕەنسی بوو) و ھەر لە ڕیاڵیشەوە چوبوە لیۆن گەڕێنرایەوە بۆ بۆ ڕیاڵ و یۆڤیتش ( کە یەکێک لەباشترین گۆڵکەرانی بۆندسلیگا بوو )بۆندی لەگەڵ کرا ،لەگەڵ ھێرشبەرانی تری ڕیاڵدا گلەیی زۆریان لێ دەکرێت کە گۆڵ کەم ئەکەن وئەوەتا ھەر بنزیمە گۆڵکاری تیپەکەیە ، بۆ ڤینیسۆس ڕەنگە ڕاست بێت و ھەلی پێ درابێت بەڵام بۆ ماریانۆ و یۆڤیتش ڕاست نیە چونکە ستەمیان لێ کراوە و ھەلی
یاریکردنیان پێ نەدراوە ئیتر لەسەر کورسی یەدەگەوە کەستان بینیوە گۆڵ بکات ؟ .
بنزیمە ھێرشبەری سەرەکی ڕیاڵە چاک بێت یان خراپ، گۆڵ بکات یان نا ھەرزۆرترین کات لەپێکھاتەی سەرەکیە کەئەمە ھەم ڕیاڵ و ھەم زیدانی ئیحراج کردوە و ڕوبەڕوی ڕەخنە وتوانجی زۆری کردونەتەوە کە بۆ؟ تۆ بڵێی زیدان ھێرشبەری یانەکانی تر نابینێت !! لەکاتێکدا لە پاریس سان جێرمان کاڤانی و ئیکاردی یاریان بەر ناکەوێت ، لە مان سیتی ئەگوێرۆ و ستیرلینگ و خیسۆس بەنۆرە یاری ئەکەن و تەنانەت لە ئەتلەتیکۆ مەدرید کۆستا و مۆراتا بەسەرە بەشداری ئەکەن و لە لیڤەرپوڵ ئۆریگی یاری بەرناکەوێت ولە کوێ و لەکوێ ئەم بەتەمایە بە کەریم کێبڕکێی ھەمویان بکات متمانە و ھەلی یاری بەکەسی تر نادات لەبەر ئەو ، و ئەو یاریزانانەی تری لەکۆتریش کردوە و لە قەلیش ھەم لەیانەکانی پێشویان و ھەم لە یاری کردن لە ڕیاڵدا کە ئەمەش بێویژدانیە .
تۆپی پێ بە گۆڵ بردنەوەی تیا بەدەست دێت و خول و جامیش بە بردنەوە و سەرکەوتن بەدەست دێت و چامپێۆنزلیگ و لالیگا تیپێ بە دەستی ناھێنێت ھێرشبەری نەبێت یان ھێرشبەرەکەی کەریم بنزیمەبێت ، ئەوانەی کە ئەشڵێن کەریم دوھەم گۆڵکاری لالیگایە ئەگەر میسی ئەو کۆمەڵە یاریەی کە بێبەشبوو لەیاریکردن دانەبڕایە بەڕاستی ئێستا نزیکەی دووئەوەندەی کەریم گۆڵی ھەبوو ، چونکە ھێرشبەری تیپەکانی تر ھەلی بون بە گۆڵکاریان نیە و کێبڕکێ لەنیوانی یاریزانی دوو گەورەکەدایە و ئەوانی تریش یان خراپن لە گۆڵکردنا وەک ڤینسۆس یان یاری ناکەن وەک ماریانۆ و یوڤیتش .
سەیری ئەو سیستەمەم لێ دێت کە پەیڕەو ئەکڕێت لە و یانە گەورانەدا و لەڕیاڵیشا تۆ وەرە سەدان ملیۆن یۆرۆ بدەی بە یاریزان و ڕاھێنەرێک بھێنی ھەر بە ملیۆنان یۆرۆ بە ڵام بۆت نەبێت پێی بڵێی ئەمە بێویژدانیە ، ئەمە خزم خزمێنە و برادەر برادەرێنەیە ، ئەمە سەپاندنی مەزاج و خواستی خۆپەرستیە بەسەر یاریزاناندا نەک سەرپەرشتی و ڕاھێنەرایەتی ئەگینا خۆ دیدیە دیشامپ خەلەلی ئەقڵی نیە کە دەرگای ھەڵبژاردەی فەڕەنسای لە کەریم قفڵ داوەو کلیلەکەشی فڕێداوەتە دەریاوە چونکە لە سەردەمیکداین کە ڕۆناڵدۆ ومیسی و نیمار و ئیمپاپی و لیڤاندۆڤسکی و مانی و سەڵاح و کێ و کێ ھێرشبەری ھەڵبژاردەکانی جیھانن ، ھەڵبژاردەیەک نابێتە پاڵەوان گۆڵکەرەکەی بنزیمە بێت.
ئەم دنیایە قەدەر و ڕێکەوت و ناوچەوان زۆرترین ڕۆڵ ئەگێڕی تیایدا لەکاتیکدا ئۆبامیانگ و ئیکاردی و ھالاند و ئیمپاپێ وزۆر ھێرشبەری تر خەون بەیاریکردن بۆ ڕیاڵ ئەبینن ، ئەمان دانیان گرتووە بە یاریزانێکدا کە قەدەر نەبێت موستەحەقی لیۆن یان مارسیلیا زیاتر نیە ونەشبووە ئەگینا قەدەر نەبێت لیڤاندۆڤسکی و ئیکاردی و ھاری کین و ئەگویرۆ و کۆتینھۆو کاڤانی وئۆبامیانگ و کێ وکێ چارەکێکی ئەو چامپێۆنزلیگیان نیە !!!!
کاتێک ڕیاڵ یەک لەسەریەک چامپێونزلیگی ئەبرد چەندین جار وتومە ئەم ھەمو سەرکەوتنانە بە دە یاریزان و نیوەوەیە جا وەرە یانزەی تەواو بن ، ھەمیشەش مەبەستم لەنیوەکە ئەو بووە بەڵام سەیر و عەجایب و سەرسوڕمانەکە لەوەدایە چۆن ئەم ھەموو کاتە مایەوە و چۆن ئەم ھەموو ھەلەی پێدرا، ئەگینا چۆن تیپێک کاسیاس و ڕائول و ڤان نیستەڕۆی و ڕۆناڵدۆی گەورە و ئۆزیل و ئاریان ڕۆبن وکاکا و ھیگواین ودیماریا و و کریستیانۆی مەزن کە تائێستاش زۆربەیان ئەستێرەی خول و تیپەکانیانن بە ڕێ ئەکات بە شێوازێکی ناشایستە و ناشرینیش بەڵام دانی گرتووە بە کەریم بنزیمەی بێ نەزم و نیزامدا و بە ھیچ شێوەیەک دەستبەرداری نابێت .
جا خۆشی و نوکتە لەوەدایە ئەم ھەموو نوسین و لێکدانەوانەی لەم چەند ڕۆژەدا لە سەر کەریم بنزیمە نوسراوە و گوتراوە لە یاری چارەنوسسازی مان سیتی زیدان گوێ بەکەس نادات و بە شارەی کابتنیەوە نەوەت دەقیقەی ڕێک یاری ئەکات بە کاتە زیادکراوەکانیشەوە، ئەڵاھومە مەگەر یان لە ڕاھێنانەکانە توشی پێکان بێت یان توشی ڤایرۆسی کۆرۆنابێت.