ئه‌و كاره‌ خێرخوازییانه‌ی كریستیانۆ رۆناڵدۆ هه‌زاران منداڵ و هه‌ژاری پێ دڵخۆش كردووه‌

پێڵاوه‌ زێڕینه‌كه‌ی له‌پێناوی منداڵانی فه‌ڵه‌ستین فرۆشت

كریستیانۆ رۆناڵدۆ كه‌ ساڵانه‌ ده‌یان ملیۆن دۆلار سه‌روه‌ت و سامان كۆده‌كاته‌وه‌، جگه‌ له‌ ناوبانگ و سه‌روه‌ته‌كه‌ی له‌ ماوه‌ی ژیانی وه‌رزشی خۆیدا ده‌یان كاری خێرخوازیی كردووه‌، كه‌ ئه‌و هێرشبه‌ره‌ پۆرتوگاڵییه‌ خۆی له‌ خێزانێكی هه‌ژار له‌دایكبووه‌ و به‌ منداڵی نه‌بوونی و هه‌ژاری زۆری به‌ڕێكردووه‌.

كریستیانۆ رۆنالدۆ له‌ دوایین دیمانه‌یدا دانی به‌وه‌دانا كاتێك منداڵ بووه‌ له‌ چێشتخانه‌یه‌ك پاشماوه‌ی خواردنی خه‌ڵكی وه‌رگرتووه‌ و خواردوویه‌تی، رۆژنامه‌ی ( زه‌ سه‌ن)ی به‌ریتانی گرنگترین ئه‌و 9 كاره‌ خێرخوازییه‌ بڵاوكردووه‌ته‌وه‌ كه‌ كریس كردوویه‌تی:

1- ساڵی 2011 كاتێك كریستیانۆ رۆناڵدۆ به‌ تۆماركردنی 40 گۆڵ له‌گه‌ڵ ریال مه‌درید بووه‌ گۆڵكاری خوله‌ به‌هێزه‌كانی ئه‌وروپا و پێڵاوی زێڕینی به‌ده‌ستهێنا، ئه‌و خه‌ڵاته‌ تایبه‌ته‌ی له‌ مۆزه‌خانه‌ تایبه‌ته‌كه‌ی خۆی هه‌ڵنه‌گرت، به‌ڵكو هه‌ڕاجی كرد و به‌ ملیۆنێك و نیو یۆرۆی فرۆشت و به‌ پاره‌كه‌ی چه‌ند قوتابخانه‌یه‌كی له‌ كه‌رتی غه‌زه‌ له‌ فه‌ڵه‌ستی دروستكرد.

2- ساڵی 2013 كریستیانۆ رۆناڵدۆ جارێكی دیكه‌ خه‌ڵاتێكی دیكه‌ی گرانبه‌های فرۆشت، ئه‌مجاره‌ تۆپه‌ زێڕینه‌كه‌ی له‌ له‌نده‌ن هه‌ڕاجكرد و به‌ نزیكه‌ی 651 هه‌زار یۆرۆ فرۆشتی و داهاته‌كه‌ی به‌و ده‌زگا خێرخوازیانه‌ به‌خشی كه‌ چاره‌سه‌ری ئه‌و منداڵانه‌ ده‌كه‌ن كه‌ نه‌خۆشی مه‌ترسیداریان گرتووه‌.

3- ساڵی 2013 كریستیانۆ رۆناڵدۆ ئه‌و پاداشته‌ی له‌ فیدراسیۆنی تۆپی پێی ئه‌وروپای وه‌رگرت كه‌ بڕه‌كه‌ی ده‌گه‌یشته‌ 100 هه‌زار یۆرۆ، به‌ رێكخراوی خاچی سووری به‌خشی.

4- ساڵی 2014 كریستیانۆ رۆناڵدۆ ئه‌و 550 هه‌زار یۆرۆیه‌ی به‌بۆنه‌ی به‌ده‌ستهێننای انزناوی چامپیۆنزلیگ له‌ ریال مه‌دریدی وه‌رگرت به‌ (رێكخراوی رزگاركردنی منداڵان، رێكخراوی یونیسێف، رێكخراوی دیدگای جیهانی) به‌خشی كه‌ وه‌كو باڵیۆزی هه‌ر سێ رێكخراوه‌كه‌ ده‌ستنیشانكراوه‌.

5- له‌ نیسانی 2015 دۆن بڕێك پاره‌ی وه‌كو كۆمه‌ك بۆ زه‌ره‌مه‌ندانی بومه‌له‌رزه‌ی نیپال ره‌وانه‌ كرد به‌بێ ئه‌وه‌ی بڕی پاره‌كه‌ ئاشكرا بكرێت.

6- ساڵی 2007 به‌بۆنه‌ی چاكبوونه‌وه‌ی دۆلۆریسی دایكی له‌ نه‌خۆشی شڕپه‌نجه‌ 147 هه‌زار یۆرۆی وه‌كو یارمه‌تی به‌خشییه‌ ئه‌و نه‌خۆشخانه‌یه‌ی دایكی تیادا چاره‌سه‌ركرا.

7- ساڵی رابردوو كریستیانۆ په‌یامێكی ئاڕاسته‌ی منداڵانی سووریا كرد كه‌ به‌هۆی جه‌نگی سووریا بێ ماڵ و كه‌س ماونه‌ته‌وه‌، دۆن به‌ برێك پاره‌ كۆمه‌كیشی كردن به‌ڵام داوای له‌ رێكخراوی رزگاركردنی منداڵانی جیهانی كرد بڕه‌كه‌ی ئاشكرا نه‌كه‌ن.

8- كریستیانۆ رۆناڵدۆ له‌ زۆربه‌ی بۆنه‌كان منداڵانی جیهانی له‌یاده‌ و ساڵی 2014 كاتێك خه‌ڵاتی تۆپی زێڕینی به‌ده‌ستهێنا، له‌ په‌یامه‌كه‌یدا داوای كرد هاوكاری ئه‌و منداڵانه‌ بكرێت كه‌ تووشی نه‌خۆشی شێرپه‌نجه‌ بوون.

9- كریستیانۆ رۆناڵدۆ له‌ رێگای دیمانه‌یه‌كی له‌گه‌ڵ كه‌ناڵی iTVی به‌ریتانی داوای كردووه‌ ئه‌و سێ كچه‌ بدۆزێته‌وه‌ كه‌ له‌ سه‌رده‌می منداڵی له‌ شاری مادێرا پاشماوه‌ی خواردنی میوانه‌كانیان پێده‌دان، ده‌یه‌وێت پاداشتیان بكاته‌وه‌ و ده‌عوه‌تیان بكات.

بابه‌تی هاوشێوه‌

Back to top button
Close