گوادیۆلا گره‌وه‌كه‌ له‌سه‌ر (30) خوله‌كی یه‌كه‌مه‌

نوسنی: هه‌وراز كاوه‌ (شرۆڤه‌كاری تۆپی پێ)

كارلۆ ئه‌نچیلۆتی ڕاهێنه‌ری ئیتاڵی له‌ كتێبه‌ نوێكه‌ی (Quiet Leadership) له‌سه‌ر گواردیۆلا ده‌ڵێت: له‌گه‌ڵ ئه‌و ڕاهێنه‌ره‌ بابه‌ته‌كان جیاوازه‌، ئێوه‌ ده‌زانن كۆنتڕۆڵی تۆپ لای ئه‌و گرنگه‌ و تیپه‌كه‌ی ئه‌وه‌ ده‌كات و ده‌بێت ڕاهێنه‌رانیش قبوڵی بكه‌ن، هه‌روه‌ها كه‌س ناتوانێت ڕكابه‌ری ئه‌و بكات له‌ كۆنتڕۆڵی تۆپ بۆ ماوه‌ی (90) خوله‌ك، به‌ڵام بۆ ڕاهێنه‌ری زیره‌ك و شاره‌زا تێكدانی ئه‌و لایه‌نه‌ ئاسانه‌، ئه‌مساڵیش كڵۆپی ئه‌ڵمانی ئه‌مه‌ی به‌رجه‌سته‌كرد.

ئه‌وه‌ی نوخته‌ی هێزی یانه‌ی لێڤه‌رپووله‌ له‌م قۆناغه‌ی خولی یانه‌ پاڵه‌وانه‌كانی ئه‌وروپا، بردنه‌وه‌بوو له‌ یاریی چوون له‌سه‌ر یاریگای ئه‌نفێڵد له‌ یانه‌ی سیتی (3 به‌ 0)، كه‌ ئه‌مه‌ش تا ڕاده‌یه‌ك ئاسایشی یاریی ئه‌مشه‌وی تیپه‌كه‌ ده‌سته‌به‌ر ده‌كات. له‌ یاریی پێشوو (یۆرگن كڵۆپ) به‌بێ‌ بیركردنه‌وه‌ ته‌نیا له‌ به‌رگری و خۆ بچووكردنه‌وه‌ له‌ ناوچه‌یه‌كدا توانی له‌ ڕێگای گوشاری به‌رز و خێرا له‌ نیو كاتژمێر پیپ (گوادیۆلا) تێكبشكێنێت، بێجگه‌ له‌وه‌ توانی ڕێڕه‌وی یارییه‌كه‌ له‌ڕووی هونه‌ری و كه‌سایه‌تی و ده‌رونی ده‌ست بخات، به‌ڵام له‌ گێمی دووه‌م هه‌ندێك په‌رش و بڵاوی له‌ ئاستی لێڤه‌رپوول به‌ده‌ركه‌وت، چونكه‌ (پیپ) هیچ ده‌رچه‌یه‌كی دیكه‌ی نه‌بوو ته‌نیا گوشار كردن و هێنانی گۆڵێك نه‌بێت، ئه‌مه‌ش (كڵۆپ)ـی ناچار كرد ته‌نیا له‌بیری پاراستنی لایه‌نی جه‌سته‌یی ئه‌ستێره‌كانیدا بێت، تا كۆتایی گێمی دووه‌م، به‌ڵام له‌ به‌رامبه‌ردا ڕاهێنه‌ری سیتی ته‌نیا ده‌یوست سوود له‌ لاوازی به‌رگریكاری ڕكابه‌ر ببینێت، كه‌ ته‌نیا له‌ ناوچه‌كانی خۆیاندا ئه‌ركیان دوورخستنه‌وه‌ی تۆپه‌كانبوو، نه‌ك وه‌كو گێمی یه‌كه‌م یارمه‌تی پێشه‌وه‌ بده‌ن، هه‌روه‌ها هه‌ڵنه‌كشانیان بۆ نیوه‌ یاریگا به‌ سه‌ركردایه‌تی هۆڵه‌ندی (فیرخێل ڤاندایك) ئه‌و تیپه‌ی گۆج كردبوو، كه‌ ته‌نیا یه‌ك بست ڕووبه‌ریان هه‌بێت گۆڵ ده‌كه‌ن.

هه‌ڵه‌ی ستراتیجی گواردیۆلا له‌م یارییه‌دا ئه‌وه‌بوو وه‌كو پێشوو ته‌نیا بیری لای ئه‌وه‌بوو هه‌موو ڕووبه‌ری یاریگاكه‌ قۆرخ بكات، یان ئه‌وانه‌ی ئه‌ركی به‌رگری و پاڵپشتی ئه‌و هێڵه‌ن هه‌موو به‌شداربوون له‌ دروستكردنی هێرش و چوونه‌ سه‌ر تیپی دژ، به‌ڵام له‌كاتی وه‌رگرتنی تۆپ لای یاریزانه‌كانی ئه‌نفێڵدا به‌ تایبه‌تی (محمد صه‌لاح و سیدۆ مانی و فێرمینهۆ) به‌هۆی خێرایی و گوشاری له‌ ناوكاو به‌ چه‌ند چركه‌یه‌ك ده‌چوونه‌ سه‌ر گۆڵی سیتی و به‌هۆیه‌وه‌ كاره‌سات له‌ شاری مانچسته‌ر ڕوویدا، هه‌روه‌ها كۆی ده‌ستبه‌سه‌ردا گرتنی یارییه‌كان له‌م وه‌رزه‌دا لای سیتی له‌ 66% بووه‌، به‌ڵام له‌ یاریی پێشوو به‌هۆی كه‌می ڕوبه‌ڕوو و جوڵه‌ی خاوی یاریزانه‌كان دابه‌زی بۆ له‌ 33%.

له‌م یارییه‌دا بوونی (كۆن ئه‌گویۆرۆ) خاڵی یه‌كه‌می هێزی ستیزنه‌، ئه‌و ستاره‌ خاوه‌نی ئه‌زموونێكی زۆره‌ له‌ خولی پرێمه‌رلیگ و به‌رگریكاره‌ گه‌وره‌كان، به‌ تایبه‌تی جوڵه‌ی بێزاكه‌ر و لێدانی كوشنده‌ی هه‌یه‌، هه‌روه‌ها یارمه‌تیدانی ناوه‌ڕاستی یاریگا و تواناداره‌ به‌وه‌ی ده‌رفه‌ت بۆ هاوڕێكانی دروست بكات، نه‌ك ته‌نیا وه‌كو (گابرێل خیسۆس) چاوی له‌وه‌ بێت هه‌موو كاره‌كه‌ به‌ حازری بێته‌ به‌رده‌ستی جگه‌ له‌وانه‌ (گواردیۆلا) هه‌ندێك خاوی و دوركه‌وتنه‌وه‌ له‌نێوان دووانه‌ی دڵی به‌رگری و هه‌ڵكشانی چه‌پی یاریگا و ته‌رككردنی هێرشبه‌ره‌كانیدا هه‌یه‌، به‌ تایبه‌تی (ئۆتامێندی، كۆمپانی) له‌ پچڕاندن و لێدانی تۆپی هه‌وایی لاوازن، به‌شداری (لاپۆرت)ـی فه‌ڕه‌نسی له‌ چه‌پی یاریگا و ته‌نیشت (محمد سه‌ڵاح) جارێكی دیكه‌ (پیپ)ـی تووشی سزادانكرد، یان تێگه‌یاند ئه‌و بنكه‌یه‌ له‌ ڕۆژگاری ئه‌مڕۆی تۆپی پێدا مه‌ترسیدارترین شوێنی یاریكردنه‌.

پێم وایه‌ یارییه‌كه‌ی ئه‌مڕۆ جگه‌ له‌ چه‌كی هێرشبه‌ردن هیچ لایه‌ك بیر له‌وه‌ ناكه‌نه‌وه‌ خۆیان بخزێننه‌ نیوه‌ یاریگایه‌كی بچووك، هه‌رچه‌نده‌ گومان له‌سه‌ر به‌شداری (سه‌ڵاح، لالانا، هیندیرسۆن) هه‌یه‌، به‌ڵام سیتی پێویستی به‌وه‌یه‌ له‌ ماوه‌ی ته‌نیا نیو كاتژمێر ئه‌نجامه‌كه‌ هه‌ر نه‌بێت یه‌كسان بكاته‌وه‌، له‌ كاتێكدا جیاوازی گۆڵه‌كان هێنده‌ زۆره‌ پێویستی به‌ ته‌كتیكی زیاتر نییه‌، گومانیش له‌وه‌ ناكرێت سیتی گۆڵ نه‌كات له‌و ماوه‌یه‌دا، چونكه‌ ئه‌م وه‌رزه‌ تاكه‌ تیپی پرێمه‌رلیگه‌ (24) گۆڵی له‌ (30) خوله‌كی سه‌ره‌تای یارییه‌كاندا كردووه‌، له‌ به‌رامبه‌ر ئه‌وه‌دا تیپی لێڤه‌رپوول له‌ماوه‌ی پێشوو به‌رگریكارانی كه‌مترین هه‌ڵه‌یان كردووه‌، كه‌ ته‌نیا چوار لێدانی سزایان له‌سه‌ر هه‌ژمار كراوه‌ به‌هۆی گوشاری تیپه‌كانی ڕكابه‌ر، ئه‌مه‌ش واده‌كات تا كۆتایی یارییه‌كه‌ چاوه‌ڕانی ئه‌وه‌بین، چ شتێكی نوێ‌ پێشكه‌ش ده‌كرێت، كه‌ ڕه‌نگه‌ به‌ ته‌قینه‌وه‌ی تازه‌ی تۆپی پێ‌ ناوببرێت.

Tags

بابه‌تی هاوشێوه‌

Back to top button
Close